問下你地嘞，有一樣嘢，無論你係男人或者女人都想得到嘅，大家知唔知係咩？就係幸福！
一個女人要得到幸福，佢就要做一個旺夫嘅女人。
一個男人要得到幸福，佢就要搵一個旺夫嘅女人
只要咁樣，無論你地喺埋一齊幾耐，發生啲咩嘢事都好，你地都可以維繫到一段好好嘅感情。
若然，你問吓一個男人，有一個好靚嘅女人而佢係剋夫嘅，同一個唔靚嘅女人而佢係好旺夫嘅，佢會揀邊個呀，佢一定會答你揀個旺夫嘅。所以你地男男女女想得到幸福，旺夫係好緊要嘅。
咁究竟一個女人點樣先至係旺夫呢，一樣嘢，令到個男人行好運就得架嘞，一個男人好地地，識咗你之後，佢搭車唔會送車尾，要泊車就有標位，食薯片都唔會生飛滋，行行吓街都執到錢！做男人你想唔想？
所以做女人做到咁旺夫，無論個男人之前有幾多感情缺失，做男人點會放過呢個女人呢，佢實呢生呢世都同佢喺埋一齊嘞，所以旺夫就係當代女性要做嘅事，之但係我留意到，而家嘅女人大部份都係剋夫嘅，剋夫嘅意思即係咩呢，就係會成日無啦費咁都令到你丈夫黑面嘅，呢啲咪剋夫囉。
傳統嘅女性，溫文爾雅，賢良淑德，千而百順，逆來順受。
現代嘅女性最剋夫嘅致命傷就係「一言九頂」嘞，個老公講一句，你頂佢九句。
譬如話你喺屋企辛辛苦苦充滿愛心咁煲咗一煲潤肺湯等個老公返嚟飲，個老公返到嚟你第一時間同佢講：「飲湯嘞。」
個老公只係講咗一句：「得嘞轉頭先啦。」
你就會答佢：
「而家飲啦！」
「煲咗成日架喇！」
「凍咗無益架！」
「又係你叫我煲嘅！」
「煲咗你又唔飲！」
「轉頭又唔見咗人！」
「陣間凍咗又要我煲返熱佢！」
「我煲得好辛苦架！」
「你唔鐘意飲你咪出聲囉！」
一言九頂，呢啲咪剋夫囉！
呢啲說話，唔好話剋夫啦，其實你呢個人應該無朋友囉，咁幸福又點會降臨响你身上呢。
姊妹，所以做女人要旺夫，無論個男人之前有幾多感情缺失，做男人係唔會放過呢個女人，佢實呢生呢世都同死心塌地咁同呢個女人喺埋一齊啦，做女人你想唔想？想吖嘛！
想嘅話，做女人就要做一個旺夫嘅女人，做男人就要搵一個旺夫嘅女人。咁樣幸福就會降臨响大家身上啊！
—— 摘自舞台剧『微男博女』
Search